وحك رصعت خدودك وحك شفتاك
انسبيت بيوم وسط الكلب شفتاك
شيخلصني بعد شرتاح شفتك
بعدك والقرب نفس الاذية
حبك شامة بخدودي ودكة
وحط بالكلب بسمارك ودكة
شكم دكة شفت منك ودكة
رغم كل هذا احبك مو بدية
وياك ارد اصيرن مجهر اني
وما اسكت بحبك مجهر اني
ماي شفاف غير مج هراني
وبس ماي البشفتك عذب الية
ردت طيفك يلوح بيوم مالاح
وطعم فركاك صار هواية مالح
بعد ما ادز رسالة وابد مالح
لان كل ما ادز تصنف علية
الكلب من ساعة الحبك هلك ليش؟
احجي وياك وتحجي ها لك ليش
اقتنعوا كل هلي هللك ليش
ما قنعوا بحبك ليش اليه
عليل وكون اطيبن يوم وابرة
ومن ذنب الجنيته ارتاح وابرة
عشرتي وياك عشرة ثوب وابرة
يبززني واكول يروف بية
حبيبي بيا بخت وياي شديت
وعلى هجرك الي شقدمت شأديت
حتى تذكر بصبعك خيط شديت
انحصر دمك ولا فكرت بية